Home
Notiziario
ChiVuol'esserLettoSia
Nel tempo
Personaggi
Photogallery
Rimestanze
RSS

sabato 20 aprile

STATISTICHE

Visitatori : 3144908

Pagine visitate : 85930762

Utenti connessi : 25

Il piacere di leggerli

Iscriviti alla
Mailing list
Email:

Rimestanze


Indietro

Nello CassataCassata Nello
[ Barcellona Pozzo di Gotto (ME) 06/04/1913 , Barcellona Pozzo di Gotto (ME) 1973 ]

CURAGGIU, SICILIANI!

Curaggiu, siciliani,
non semu cchiù pizzenti,
strincemundi li mani,
niscemmu di li stenti!

A Ragusa,
scavannu purtusa,
nesci 'u gasoliu,
schiccia 'u pitroliu!

Curaggiu, siciliani,
dicemmuccillu è genti:
truvammu 'u nostru pani
e soddi a bastimenti!

Cchiù ccavia
vicinu a Bafia,
mmucciatu è un tesoru
d'argentu e d'oru!

Curaggiu, siciliani,
jttammu li pidocchi;
ora l'amiricani
mi chiantunu finocchi!

Abbassu l'angustii,
avemu l'industrii,
fineru li mali
du sùffuru e dù sali.

da Aranciu amaru


___________________________________________________________________

PANI E SULI

Lentu parti 'u vapuri,
si sciogghi da banchina;
chi vista, chi splenduri
stu suli di Missina!

'U celu si cunfundi
ccà luci di lu mari,
e duci duci l'undi
stannu a trimuliari.

Ma sunnu fogghi morti
i cori di sta genti;
sempri la stissa sorti
di fami e patimenti.

Ddassupra da banchina,
lacrimi e fazzuletti;
si spezza 'na catina
di li cchiù forti affetti.

Sunnu siciliani
chi vannu a la strania,
'n cerca d'un tozzu 'i pani
fannu luntana via.

Intantu attracca genti,
diretta a Taurmina:
- Okei, com'è accuglienti
'u suli 'i sta marina! -

da Aranciu amaru


___________________________________________________________________

VINCIU 'U SUL!

Forza, picciotti,
mparati i mani,
cci nn'è pi tutti
suli sta jurnata.
Non v'affuddati,
non vi sciarriati
chi non finisci:
è suli e non è pani.
Allegramenti, genti,
mparati sacchi,
inchiti casci, giarri,
magazzeni, a carca e menti.
Quant'è sta rota 'n celu!
La durlindana di la nos'tra terra,
la spada domaschina chi gira 'n tundu,
russa, nfucata, raggiata,
d'amuri e gilusia.
Cummògghia Muncibeddu,
ruzzulia pà chiana,
scìddica pà chiana,
scìddica supr'ó mari di Missina,
si jetta arreti munti Pilligrinu.
Cummògghia puru lacrimi e pinseri,
stenti e suduri,
e tuttu 'u mundu è pani.
'A sintiti sta musica d'aceddi,
d'arriddi, di cicali?
Briscìu stamatina stu cuncertu,
ntè ranciari, vigni, livari,
boschi, vadduni e timpi,
nsèmula ò cantu di lu carritteri,
pi fari festa ò suli.

da Aranciu amaru


___________________________________________________________________

MATRI TERRA

A tia riturnamu, matri terra,
figghi pintuti, figghi ntussicati.
Aprindi li brazza, randi matri,
fommu lijati a machini maligni
'n nomu di 'na fausa civiltà.
Ristorinni, suli, l'occhi nfummicati,
rinfrischini, celu, i prummuni nvilinati,
cammini, aceddu, li nervi spizzati,
l'aricchi di rumuri martiddiati.
O matri terra,
ma comu ti pòttumu lassari.
Ndi prumitteru, matri, mari e munti,
e vadda, matri, undi semu junti!

da Aranciu amaru


___________________________________________________________________

CARRETTO SFASCIATO


Sentu miolu cianciri
ntra l'assu sbucalatu
d'un carrettu,
ntè strati da me' terra.
Cu' sapi quantu havi caminatu?
Sentu ciusciari
scutuluni di mulu,
campaneddi ciaccati,
accumpagnari vuci ncatarruta
di carritteri
lamintusu e stancu.
Sentu chi s'alluntana
ntà vutata,
pù sapi undi.
Iammozza laschi,
cunsuntuti,
ciancianeddi surdi,
coppa di zotta
senza scurriatu...

da Aranciu amaru


___________________________________________________________________

'A BEDDA

Vampa ch'addumi, sì fimmina bedda,
chi quandu passi dai lu batticori;
non cc'è pirsuna chi 'na baciatedda
non tà daria ccu tuttu lu cori.

Tu ti nn'accorgi e fai 'na risatedda,
cumpiaciuta di li toi tisori;
la bucca russa e li to' fussittedda
fannu scurdari puru chi si mori.

Fatta ccu turnu, li capiddi ò ventu,
a bedda jamma com'unda marina
avanza ccu grazia e purtamentu.

Sini la vita, 'a gioia, sì turmentu,
sini la miravigghia cchiù divina,
rianima chi l'omu coci a focu lentu.

da Aranciu amaru


___________________________________________________________________



Pagina 2 di 4___________________<< 1 2 3 4 >>

Indietro